Masinolub-on

FELINO S. GARCIA, JR. 

BAG-O LANG GID sia nakabalik halin sa iya lunch break nga isa ka oras. Pagkagwa niya sa elevator sang ika-kwarenta nga panalgan sang RCBC Tower nga nahamtang sa Ayala Avenue sa Syudad Makati, nagdiretso sia sa locker room kag ginkuha niya ang iya sepilyo kag ang magamay nga Pepsodent halin sa iya locker. Dayon sia nagpadulong sa men’s room agod manipilyo. Pagkahuman sang pagpanipilyo kag iban pa nga hilikuton nga naangot sa mga kinahanglanon sang lawas sa banyo, nagbalik sia liwat sa locker room kag ginpangkandadohan ang iya sepilyo kag ang Pepsodent sa sulod sang iya locker. Bag-o sia nakalambot sa operations floor, naghapit sia anay sa pantry kag didto niya nakita ang isa ka mestisahon nga babaye—may duag nga pagka-brunette ang buhok, mataas ang ilong, indi gid man tuman ka maputi ang supat, kag ayhan kon madapatan sang init sang adlaw ang pamanit, masami nga nagapalamula. Kon sia ang magabana-bana, indi gid man tuman siguro ka taas kon magtindog ining babaye  kay basi pa man pareho lang man ang ila nga height nga duha. Nakadekwatro ang pamungko sang babaye samtang ginatulotigsim sini ang Sprite-in-can nga ginauyatan sang nawala niya nga kamot.

            “Hi,” panamyaw niya sa babaye pagkatapos niya ginkuha ang Fita sa vendo machine. Bisan pa nga nakapanipilyo na sia, naandan na niya nga magbakal sang biskwit kag ginakuyam-kuyam niya ini kon mag-abot na sa ulihi ang iya kinse minutos nga break bag-o matapos ang iya shift sa amo sina nga gab-i pakadto sa kaagahon.
            Nagyuhum ang babaye kag ginlag-ok sini sang makadali ang softdrink halin sa lata.
            Nagdali-dali na sia nga nagbalik sa operations floor kag diyes minutos na lang kag magasugod na naman ang nabilin nga apat ka oras sang iya shift.
            Waay pa sa gihapon nakakas sa iya pamensar ang laragway sang babaye nga gintamyaw niya kaina  sa pantry. Kon indi lang nga ma-late sia sa pag-log-in liwat sa iya Avaya, luyag niya gid kuntani nga makilala sang tampad ang babaye kaina. Basi isa ato sia sa mga bag-o nga mga empleyado sang kompaniya—huna-huna niya samtang ginpindot na niya ang iya nga Avaya agod makasulod sa iya linya ang kliyente nga nagapanawag sa iya.
            Waay gid man sia nagsayop kay mationtion sa iya gid man work station nagpalapit ang gintamyaw niya kaina nga babaye.
            “Ako si Ines…Ines Purisima,” pakilala sang babaye sa iya.
            “A, huo, ikaw ang nakita ko kaina sa pantry...Si Rene gali…Rene San Jose,” kag dayon niya ginapangamusta si Ines nga nagpungko sa luyo niya nga may dala sang headseat kag Y jack.
            “Ma-buddy up ako sa imo.”
            “Ay huo, waay problema, a,” ginkuha niya ang headset sa kay Ines kag ginkonekta ang kable sini sa  entrada sang iya headset agod mabatian ni Ines ang istoryahanay ni Rene kag sang kliyente sa telepono.
            Waay madugayan, ginpindot na ni Rene ang pula nga button kay bag-o lang gid nagsulod sa linya ang pagpanawag sang kliyente. Nakita na niya ini sa screen sang iya Avaya. Nagsugod na nga ginmitlang ni Rene ang iya nga spiel: Thank you for calling Wal-mart credit services. This is Rene. How may I help you…

MAS nauna pangita sang panagabuhian si Ines kaysa kay Rene. Apat ka tuig ang namagulangan niya sa kay Rene kag  malapit na sa siyam ka tuig kutob sang tuig nga nakigbulag sia sa iya bana bisan pa nga waay pa gid man nila gin-aplayan sang annulment ang ila kasal. May tatlo sila ka kabataan sang iya bana. Duha ka lalaki kag kinagot nga babaye. Ang subang nagapang-edaron sa karon sang baynte anyos, ang ikaduha napulog walo, kag ang kinagot dose anyos. Nagaobra na ang soltero nga subang sa isa ka fast food chain kasubong abi sang Jollibee. Ang ikaduha nagabutho sa kolehiyo kag ang kinagot  manogradwar sa grade six.

            Nakaobra na si Ines sa apat tanan ka call center bag-o pa man sia madawat bilang Customer Service Representative sa ginaobrahan man nga call center ni Rene.
            Ikalima na nga call center  ining ginsudlan niya nga ulobrahan kag sa madason nga semana magasugod na sia sa pagsabat sa mga panawag sang mga kliyente pinaagi sa telepono sang Avaya. Gani, indi na gid man sia bag-ohan sa sini nga sahi sang obra bisan pa sang sadto nga naga-training pa lang man sia sa amo nga account.  Sa sini nga klase sang obra, account ang pagkabig sang kaundan ukon produkto nga dapat pagatun-an sang trainee. Bangod kay credit card ang account, dapat mahibaloan ni Ines ang mga proseso ukon mga pasilkot-pasikot nga may kaangtanan sa credit card agod mahapos na lang gid sa iya magsabat sa mga palamangkotanon sang mga nagapanag-iya sang credit card tuhoy sa ila naangkon nga card, kag sa mga may plano nga makaangkon sini.
            Madasig ang pagsulod sa sini nga mga ulobrahan kay kon makapasar ka sa internet kag yara tanan  sa imo ang ginapangita sang kompaniya sa isa ka aplikante, gilayon ka nila hatagan sang job offer agod magasugod ka na sa pag-obra bisan sa training ka pa lang. Ginasuweldohan ka samtang nagabutho ka pa lang sa imo training class.

TI ready ka na magbaton calls subong?” Pamangkot ni Rene sa kay Ines bag-o pa man niya ginhanda ang iya nga Avaya kag ang mga application sa iya kompyuter.
            “Huo kay sa sini gid man nga semana ang gintalana para mag-inbound na ako,” sabat ni Ines sa iya samtang ginatrapohan sini ang workstation sang tissue paper nga ginbasa sang alcohol. Waay sang madugayan, nagapungko na sia atubang sa iya man nga computer kag Avaya. Ginsuksok na niya sa ulo ang headset  para makabaton na sia sang mga panawag halin sa mga kliyente.
            “Maayo gani kay tupaday ‘ta,” siling ni Rene.
            “Ay huo kay ti isa man lang team leader ‘ta.”
            “Sige, pamangkot ka lang sa akon kon  indi pa gid maathag sa imo,” ulihi nga mga tinaga nga ginhambal sa iya ni Rene bag-o pa man sia nagsabat sang nagsulod na nga tawag sa iya Avaya.
            Nagyuhom na lang si Ines kag naghilay-hilay sia sa iya pulongkuan. Sa amo sina nga tinakna, masako na kag magahod   ang operations floor kay daw sa nagakala-kala nga mga paka ang mga tingog sang tanan nga mga ahente samtang gina-istorya nila ang ila nga mga kliyente sa pihak nga linya.
            Bisan waay pa niya napabatyag sa kay Ines, nasadyahan sia kay kaupod niya ang babae nga ang kaanyag una niya natalupangdan sa pantry isa na ka bulan ang nagligad. Dako ang iya paglaum nga magakilal-anay pa sila sang matul-id sa paglakat sang mga inoras, sa paglupad sang mga inadlaw.

MALAPIT na sa duha ka tuig nga nagaobra si Rene bilang ahente sang credit card nga account  nga amo man ang account ni Ines. Kabisado na gid man niya ang tanan nga lihok kag pasikot-sikot sang credit card –pagkanselar sang account number sang card nga nadula ukon gintuklo, pagproseso sang mga application para sa credit card, pagpadala sang bag-o nga card kag pagbag-o sang account number.

            Sa padayon nila nga pag-obra sa amo nga account, nangin malapit sa isa kag isa sanday Ines kag Rene.
            Waay labot nga nahamtang ang ila nga mga work station sa isa ka lugar sa malapad nga operations floor sang kumboyayan, halos sa kada gab-i, pulopareho ang mga iskedyul sang ila nga duha ka break kag isa ka oras para sa panyaga. Dugang pa, nagatambong pa gid sila sa mga nanari-sari nga mga aktibidades sang center kasubong abi sang team building nga ginhiwat sa Pansol, ang town hall kag awarding ceremony sa Shangrila kag madamo pa sang iban. Magkapares sila sa ballroom dancing sang Halloween Ball nga gintambongan sang tanan nga empleyado didto sa Intercon.
            Makapila naman ka beses nga nakapamasyar si Rene sa balay  ni Ines didto sa Las Piñas ilabi na gid sang ginhiwat ni Ines ang iya ika-kwarenta nga kaadlawan. Kaupod sang pagpamalakpak sang mga tumalambong pagkatapos ginhuyop ni  Ines ang mga magagmay nga mga kandila sa ibabaw sang chocolate cake, ang pagpanamyaw sang “Happy Birthday” kag ang pagbeso-beso sa iya. Indi man malipatan ang punsyon nga ginhanda sang celebrant para sa iya nga mga bisita. Kag sang nag-abot na ang kagab-ihon, ginsugodan na ang paggwa sang mga ilimnon halin sa refrigerator kag pagtokar sang videoke nga gin-ugyonan nanday Rene kag iban pa nga mga kaupod nila sa ulobrahan. I’m all out of love, I’m so lost without you—panugod nga ambahanon ni Rene nga ginhalad niya sa kay Ines sanglit nga sa amo man nga okasyon, ginregalohan niya si Ines sang singsing.
            “Indi ko mabaton ‘ni,” siling sa iya ni Ines sang gin-abrihan na ni Rene ang kaha sang naga-inggat nga singsing.
            “Birthday gift ko ‘na sa imo,” hutik ni Rene sa iya.
            “Baw, basi tuman sini ka mahal,” nagapangduha-duha pa sa gihapon si Ines.Yara pa sa gihapon sa kamot ni Rene ang bag-o lang gid naabrihan nga kaha.
            “Dal-a di bala kamot mo kay isuok ta,” pamilit ni Rene sa iya.
            Waay sang madugayan, ginsuksok gid man ni Ines  sa isa sa mga tudlo sang natuo niya nga kamot ang singsing.
            “Happy Birthday,” panamyaw ni Rene bag-o niya ginhalokan sa pisngi si Ines.

APANG  nagbag-o ang tanan sang nakalab-ot sa iya ihibalo nga luwas sa iya, may yara pa sang ginaupod-upod si Ines.

            “Seryoso ka gid bala sa kay Ines?” pamangkot ni Claudia sa kay Rene sang nag-abtanay sila didto sa idalom didto sa ground floor sang RCBC Tower. Isa man ka call center agent si Claudia apang lain nga account ang iya ginahikot. Kaupod anay ni  Rene  si Claudia sa ginhalinan nila nga  kumboyahan didto sa Ortigas tatlo na ka tuig ang nagligad bag-o sila nagbalhin sang ulobrahan.
            “Ngaa man?” saligbat niya samtang ginatan-aw niya ang nanari-sari nga mga iced tea kag fruit juice sa kristal kag see-through nga pwertahan sang refrigerator sa Seven Eleven.
            “May nabatian ako nga istorya parte sa iya,” dugang nga tugda ni Claudia samtang ginkuha niya sa shelf ang Fita.
            “Basi kutso-kutso na man ‘na,” nag-amat-amat na pakadto sa cashier si Rene pagkatapos niya ginserado ang refrigerator. Ginauyatan sang nawala niya nga kamot ang Minute Maid.
            “Indi a…lunch break mo?”
            “Huo..pero thirty minutes na lang bilin,” ginbaydan na ni Rene ang ginbakal niya nga fruit juice kag manoggwa na sia sa Seven Eleven.
            “Mangita ‘ta bala lugar nga istoryahan,” pangabay sa iya ni Claudia pagkatapos niya ginbalik ang Fita sa shelf.
            “Ngaa na naman?” daw sa nasabadan na si Rene sa paguoikog-ikog ni Claudia sa iya.
            “Para mabal-an mo tanan.”
            Ginabrihan ni Rene ang pwertahan agod makagwa sia kag dayon niya ginbalikid si Claudia kag nagsiling, “OK, didto ‘ta malapit sa ATM. Dalion mo lang kay masaka na ko dugay-dugay.”
            Ang ATM nga gintudlo ni Rene may yara sang kapin sa kwarenta ka tapak ang antad halin sa Seven Eleven. Malaka lang ang nagatambay kag nagapanigarilyo didto. Malapit ini sa hardin sang building.
            Didto sila nagdiretso ni Rene kag Claudia. Ginpadayon ni Claudia ang iya istorya.
            “May nakakita sa iya nga naggwa sa awto.”
            “Ti ano karon?” saligbat ni Rene.
            “Didto sia halin sa front seat.”
            “Dason?”
            “May naggwa man nga isa ka lalaki sa awto kag dungan sila nagsulod didto sa Festival Mall.”
            “Sa Alabang?”
            “Huo.”
            “Ti basi kilala n’ya lang.”
            “Nagaholding hands sila kag matam-is pa sila sa kalamay sa isa kag isa.”
            “Oy, don’t tell me...”
            “Well..amo ina ang ginapakita sang ila pag-updanay,” paathag ni Claudia sa iya.
            “Indi ko magpati sa imo, a.” Ginlag-ok na ni Rene ang Minute Maid nga kaina pa niya gin-abrihan.
            “Ti…ambot sa imo.. Basta obserbahan mo lang sia.”
            Nagpamensar sang madalom si Rene kag sang gintan-aw na niya ang screen sang iya cellphone, kinse minutos na lang ang nabilin bag-o sia mag-overbreak.
            “O, ti masaka na ko kay lapit na isa ka oras...manogtapos na lunch break ko,” ulihi nga tinaga ni Rene bag-o sia nagdali-dali lakat sa mayor nga pwertahan sang building.

DAW sa indi sia  magpati sa gintuad sa iya ni Claudia sang kagab-i lang. Apang indi sia maribotay bangod sini. Day-off ni Ines kagab-i tubtob sa Domingo. Lunes pa sia magabalik sa iya workstation. Natuon naman sa Lunes kag Martes ang day-off  ni Rene. May iban nga kahagugma si Ines? Paano ini natabu  kay sa iya pagkahibalo, naghangdu na si Ines sang ginbutyag na niya nga nagahigugma sia sa kay Ines. Kag dugay na sia nga nakigbulag sa iya bana. Nagalibog ang iya ulo. Pamatyag niya nga daw mabuka ang ulo niya sa katuyo. Ginpakamaayo na lang niya nga magpuli sa iya apartment sa Vito Cruz agod makapahuway sia kay may shift pa sia sa sina nga gab-i. Kinahanglan niya nga magtulog anay. Kag sang didto na sia sa Vito Cruz, sa ikaapat nga panalgan sang iya ginaarkilahan nga apartment, ginkuha niya ang CD  sang Air Supply kag ginbutang ini sa CD player sang iya Philips CD sound machine. Ginpaandar niya ini kag sa gilayon nagsugod na sa pag-amba ang Air Supply tubtob na nga nakalambot na sa refrain sang kanta –I’m all out of love..I’m so lost without you…kag nagpiliyong na ang iya nga mga mata.

“MANGAYO gid ko pasaylo sa imo Rene,” siling ni Ines sa iya.

            “Para sa ano? Ngaa?” makita ang daku nga kakibot sa iya nga mga mata. Waay niya ginhandum ang bag-o lang gid nagkawas nga mga tinaga sa bibig ni Ines.
            “Nagbinutig ako sa imo,” daw sa nagkalawasdak nga mga balod sa batohan ang gintugda ni Ines sa iya.
            Nagapalanglumaw-lumaw ang mga mata ni Ines apang ginpunggan sini niya nga maghibi kay sa pamatyag niya basi mamutikan sang iban nga mga parokyano sang kalan-an nga Casa Armas didto sa Greenbelt. Sa tunga sang pagtulotimo-timo nila sang mga tapas kasubong sang mga croquetas, chorizo, pulpo kag iban pa nga manamit nga finger food nga yara sa menu sang restawran nga isa sa mga espesyalista sang mga linuto nga espanyol sa Makati, daw sa masalam-okan si Rene sang bag-o lang gid nga ginhambal sa iya ni Ines.
            Naka-vacation leave sia sina nga Sabado nga hapon kag sa kinaandan, day-off man ni Ines.
            “Ines, istoryahan ‘ta lang na dugay-dugay...ubosa anay pagkaon mo,” laygay niya sa kay Ines. Ginhalongan niya nga indi mamulalongan ni  Ines ang epekto sang mga ginmitlang sini sa iya.
            “Excuse me...mapa-CR ko anay,” nagtindog si Ines halin sa iya ginapungkoan kag naglakat samtang ginaoribay ang iya itum nga bag kag nagaterno sa high heels nga naghatag sang nagakaigo nga buylo sa iya tindog kag lawas. Nakapalda-blusa nga duag-asul si Ines sa sina nga mga inoras.
            Kaina sang nagkitaay sila nga duha sa Glorietta,  pagkatapos  sang pagdagon-dagon ni Rene halin sa MRT sa Ayala, daw waay man sang namutikan nga mga senyales ukon napanagupnopan niya nga amo sini ang ibuyagyag ni Ines sa iya.
            Padayon niya nga ginasaboran ang kanamiton sang gin-order niya nga mga tapas kalakip na ang vino tinto nga specialty of the house sang restawran. Gintulotigsim niya ang vino  sa wine glass pagkatapos niya ubos sang mga ginkihad-kihad nga salchichon kag queso manchego sa iya pinggan.
            Pag-abot ni Ines halin sa banyo ginhingyu niya si Rene nga kuhaon nila ang bill bisan pa katunga pa lang sang mga pagkaon nga nabutang sa iya plato ang nakaon ni Ines.
            “Nawad-an an ko gana,” siling ni Ines kag makita sa iya nawong nga daw sa nagaaliwasa sia. Nga daw may yara sang nagatublag sa iya. Kag ilabi sa tanan, may yara gid sia nga inogpautwas kag kinahanglan mapabutyag niya ini sa gilayon.
            Ginbayran na ni Rene ang tanan nga gin-order nila bisan pa nga bag-o nag-abot ang waiter sa ila nahamtangan nga lamesa, padayon ang pamangkot ni Ines kon pila gid man ang balaydan kay luyag niya makigtunga sa bill. “Ok lang, I’ll handle this,” siling ni Rene sa iya bag-o niya gin-usisa ang ila bill sang makadali kag sa gilayon ginpaholam niya ang iya credit card sa waiter.
            “Gusto mo i-take out ‘ta ang nabilin mo nga pagkaon?” pamangkot niya sa kay Ines pagkatapos nga ginbalik sang waiter ang iya credit card.
            “Indi na kinahanglan…let’s go,” saligbat ni Ines nga tumindog dayon kag nagdiretso paggwa sa pwertahan sang restawran.
            Nagsunod sa iya si Rene nga   nagapalamula na ang pagka-chinito sini nga guya  bisan nga nakasul-ob sang de-kwelyo nga checkered nga polo shirt, dark blue jeans kag itum nga Mendrez nga sapatos nga angay sa iya panglawason nga chubby nga may pagkamaputot apang mapution nga supat,  may panagupnop sia nga may yara sang indi manaya-naya nga matabo.
            Nakalambot sila sa Greenbelt Chapel nga nahamtang sa tunga sang hardin kag ginapalibotan ini sang kakahoyan kag kalabanan sini mga eucalyptus.  Natamnan sang carabao grass ang alagyan  pakadto sa chapel.  May mga bahin nga ginadilian ang pagtapak  sang mga nagalagaw-lagaw—Keep Off the Grass ang ginsulat sa karatula nga gintibsok sa duta—agod indi  matapakan ang na-trim na nga hilamon.
            “Ngaa ari kita sa simbahan?” pamangkot ni Rene sa kay Ines samtang nagadausdos sila sa pathway pakadto sa chapel. Open air ang estilo sang chapel kag bilog ang iya sini estruktura gani sarang ini sia masudlan gikan sa  apat ka pathway nga nahuman sa araal nga mga bato kag nagapalibot ang mga ini sa chapel.
            “Sunod  lang sa akon,” saligbat ni Ines sa iya. Indi pa gid man tuman ka madamu ang tawo sa sulod bangod ka luwas lamang sa mga   nagaluluhod kag nagapanagamuyu, sila lang gid nga duha ni Ines ang nagpungko sa nalikod na nga bahin malapit sa ginpatindogan sang grotto sang Birhen. Sabado pa lang sang kahaponanon kag sa Domingo pa bwas sang aga masugod ang misa.
            “Indi ko ikaw maintyendihan, Ines,” panugod ni Rene samtang nagalingkod sia sa luyo ni Ines kag ginliso niya ang iya ulo agod maatubang niya si Ines samtang ginauyatan niya ang nawala nga kamot sini.
            “I just feel guilty,” gintuon ni Ines ang iya panan-aw sa kay Rene kag nagduko sa gilayon.
            “Of what?” panukmat ni Rene sa iya.
            “Bal-an mo kadamu na sang nabulig mo sa akon, nahatag mo sa akon.”
            “Ti ano gid...hatag ko man ato tanan sa imo,” gin-agbayan niya si Ines kag nagbalalik sa iya panghuna-huna ang mga piaya, mga meringue kag napoleones nga ginadul-ong niya sadto sa Las Piñas, didto gid sa balay ni Ines  kon pananglitan nga day-off ni Ines kon magbalik na si Rene sa Manila gikan sa iya vacation leave sa Bacolod.
            “Basta, ginakonsensiya lang ako.”
            “Ngaa man?.. Abi ipautwas ina subong sa akon.”
            Waay nakasabat dayon si Ines.Nag-isdog sia gamay agod makadistan siya kay Rene. Gin-untat ni Rene ang pag-uloagbay sa iya. Pagkatapos sang kapin sa lima ka minutos nga waay sila nga nagahambalanay, nakakuha gid man buwelo si Ines kag nagsugid na sang kon ano man ang nagatublag sa iya.
            “Bal-an mo Rene, mabudlay sa akon nga ihambal ‘ni sa imo pero dapat makabalo ka.”
            “Sige mamati ako kon ano man ina,” nagapakuno-kuno sia nga waay sia naapektuhan sang nagakatabo sa sina nga ginutlo sang oras bisan pa nga kon tungkadon ang iya matuod-tuod nga ginabatyag. Ginakulbaan sia kag nagakuba-kuba ang iya dughan.
            “Luyag makig-uli sa akon ang akon bana,” napagwa gid man ni Ines sa ulihi ang dugay na niya nga ginalikom nga balatyagon.
            “Kag ano ang plano mo?” nagbaskog pa gid ang ang palpitasyon niya kag daw sa indi na niya gusto mabatian pa ang masunod nga inogtugda ni Ines.
            “Pirme na kami nagakitaay sa Alabang…sa Festival Mall. Makapila na ka beses.”
            Nagtindog na si Rene  kag nagtikang na paggwa sa kapilya tubtob nga didto na sia malapit sa mga benches sa sagwa sa idalom sang mga kakahoyan. Sang ginasilongan na sia sang mga eucalyptus, nagbalik na sa normal ang iya pagginhawa. Nagpungko sia sa isa ka bench.  Nagbalalik sa iya pamensaron ang ginpangsugid sa iya ni Claudia. Bana niya gali kag indi lang iban nga tawo. Sa karon nagapati na sia sa kay Claudia. Matuod gid man tanan ang nabatian niya.
            Nagapakadto sa iya   ginahamtangan si Ines kag nagpungko sa luyo niya.
            “Pasensiya  lang gid Rene…bal-an ko naluyag ka gid sa akon,” nagsugod na naman sang pagpangayo sang pasaylo si Ines.
            Waay sa gihapon nagsabat si Rene. Malayu ang iya panan-aw kalakip na ang dalagan sang iya ginapamensar.  Ni pagbalikid kag pagtulok sa kay Ines waay niya ginbuhat.
            Apang nagpadayon si Ines. “Salamat gid sa tanan, Rene…Indi ko ikaw malimtan.” Kag dayon sia nagtindog. Ginkuha niya ang singsing halin sa iya tudlo . Ginbutang niya ini sa palad ni Rene.
            Ginkuom ni Rene sang mahugot ang singsing samtang waay na sa iya luyo si Ines. Malayo na ang antad sang panglakaton sini halin sa ginapungkoan ni Rene. Mation-tion nagtindog si Rene kag ginhaboy sa kahawaan ang singsing. Nakabatyag sia sang kasubo. Isa ka kasubo nga hinali lang nagluntad kasubong sang hinay-hinay nga paglamon sang kadulom sa nabilin nga kasanag sang bag-o lang nga nagtunod nga adlaw.
            Sa idalom sang bag-o lang gid nga nagsililiga nga mga poste sa Greenbelt, nagsugod na sia sang iya panglakaton padulong sa ginaagihan sang taxi malapit sa hagdanan sang covered over pass  nga  nagaangot sang Greenbelt sa Landmark sa pihak nga karsada.  Nabatian niya sa liwat sa iya pamensar ang ambahanon nga ginhalad niya sadto sa kay Ines – I’m all out of love..I’m so lost without you…kag nagtulolo ang iya nga mga luha. #